షూటింగ్‌లో ‘మాయాబజార్’

విలక్షణ కామెడీ సీరియల్ ‘మాయాబజార్’ షూటింగ్ ప్రారంభమైంది. ‘ఒక టీవీ ఛానెల్ నడపడమంటే మాటలా...’ అన్న కానె్సప్ట్‌తో రూపుదిద్దుకుంటున్న ఈ సీరియల్‌లో ప్రముఖ నటుడు రంగనాథ్, నందకిషోర్, కళ్లు చిదంబరం, మధుమణి, అనన్య, రమాప్రభ, నరసింహరాజు తదితరులు నటిస్తున్నారు. ఇక కథ విషయానికొస్తే - కొండకు వెంట్రుక ముడేసి కొండను లాగడం ఎంత కష్టమో.. టీవీ చానెల్ నడపడం అంత కష్టం. ఐతేనేం చాలా కష్టపడి చాలా వెంట్రుకలు పోగొట్టుకుని.. హార్డ్‌వేలో టీవీ ఛానెల్ నడపడం నేర్చుకున్న హార్డ్‌కోర్ చానెల్ హెడ్.. రైట్ ఛాయిస్ రంగనాథం.. ఆ విధంగా ఆయన ముందుకు పోతూ ఉన్నాడు. ఇకపోతే.. క్రియేటివిటీ స్పెల్లింగ్ ‘కే’తో రాసే మహా క్రియేటివ్ బుర్ర - కల్లు చిదంబరం. ఈ చానెల్‌కు క్రియేటివ్ హెడ్. అసలాయనకు హెడ్డే లేదని స్ట్ఫా ఒపీనియను. తనకు తప్ప మిగిలిన ప్రపంచానికి మీడియా గురించి ఏమీ తెలియదని కల్లు చిదంబరం స్ట్రాంగ్ ఒపీనియన్. ఆయనకు కల్లుముంత తప్ప మరేమీ తెలియదని అందరి ఒపీనియన్. తెలుగు టీవీ మెడ పట్టుకుని హిమాలయాల ఎత్తుకు నెట్టుకు వెళ్లాలనుకునే అనన్య ఈ చానెల్ ప్రోగ్రామింగ్ హెడ్. అసలు తాను పుట్టగానే హాస్పిటల్ రూంలో ఇంగ్లీషు సినిమా చూశానని చెప్పుకునే అనన్యకు హాలీవుడ్ లెవెల్లో ప్రోగ్రామ్‌లు తప్ప మరేమీ కనపడవు. అసలావిడకు కళ్లు నెత్తికెక్కాయి కాబట్టి ఏమీ కనపడ్డం లేదని స్ట్ఫా ఒపీనియన్. ఇటువంటి విభిన్న తరహా మనస్తత్వాల తీరుతెన్నులనూ పోకడలనూ ఆద్యంతం హాస్యభరితంగా నిర్మించనున్న ఈ ‘మాయాబజార్’ - ఇంగ్లీష్‌లో టాప్ రేటింగ్స్‌తో నడిచిన సీరియల్ ‘జస్ట్ షూట్ మీ’ ఆధారంగా చిత్రీకరణ జరుపుకుంటున్న నవ్వుల పూజల్లు. కామెడీకి కొత్త నడకలు నేర్పే హ్యూమర్ ఎక్స్‌ప్లోజర్ - మాయాబజార్‌కు రచన: పల్లేటి లక్ష్మీకులశేఖర్, సంగీతం: నాని, కథ, మాటలు, దర్శకత్వం: వెంకట్ కె.కృష్ణ

Source: www.andhrabhoomi.net