ఛానెళ్ల తీరుకి రజనీ కినుక

ఏషియా నెట్ చూసేవారికి - రజనీ హరిదాస్‌ని ప్రత్యేకించి పరిచయం చేయనక్కర్లేదు. ఆ మాటకొస్తే - అడపాదడపా తెలుగు ఛానెళ్లకూ చిరపరిచితురాలే. ఒక్కమాటలో చెప్పాలంటే - ఐడియా స్టార్ సింగర్ రియాల్టీ షో రజనీ గళ మాధుర్యం ఏదో ఛానెల్‌లో వినిపించేదే. యువతని అడిగితే - దట్ హాట్ గర్ల్ అంటారు. ఎప్పుడూ పొందికైన చీరకట్టుతో కనిపించే రజనీ అటు తమిళ, తెలుగు, మలయాళ, కేరళ, హిందీ, బెంగాలీ.. ఛానెల్స్ తిరిగొచ్చింది. సంప్రదాయబద్ధంగా భారతీయ సంస్కృతికి చక్కటి ఆనవాలుగా ఉండే ఈ సెలబ్రిటీ గురించి చెప్పుకోవాలంటే బోలెడన్ని సంగతులు. రజనీ 2000లో మిస్ కేరళ కిరీటాన్ని చేజిక్కించుకుంది. మోడల్‌గానూ గాయనిగానూ నటిగానూ కెరీర్‌ని ఆరంభించిన మొదట్లో ఏషియా నెట్ యాంకర్‌గా ‘సాహసికంటె లోకం’ కార్యక్రమాన్ని దిగ్విజయంగా నడిపించింది. అప్పట్లో స్వచ్ఛమైన మలయాళ భాషలో గలగల మాట్లాడే అమ్మాయి కోసం వెతుకుతూంటే అనుకోకుండా ‘రజనీ’ కనిపించింది. అప్పటికే కొన్ని స్టేజ్ ప్రదర్శనలిచ్చి ఉండటంవల్ల ఆ కార్యక్రమ నిర్వహణ ఏమంత కష్టం అనిపించలేదామెకు. సంప్రదాయ జానపద శాస్ర్తియ సంగీతాన్ని ప్రాంతాలవారీగా పరిచయం చేసే కార్యక్రమం అది. ఐడియా స్టార్ సింగర్ కావటానికీ, రాక్ మ్యూజిక్ టాలెంట్‌ని చూపెట్టటానికి రజనీకి ఇది వేదికగా మారింది.
ప్రేమ వ్యవహారం అంటే అస్సలు గిట్టదట. ప్రేమ అనేది జీవితంలో ఓ భాగం మాత్రమే. దీని కోసం ఇన్ని మర్డర్లు, ఆత్మహత్యలు అవసరమా? అని ప్రశ్నిస్తోంది. అన్ని ఛానెళ్ల ప్రేక్షకులు ఇంతగా ఈమెని అభిమానిస్తున్నా - మలయాళ ఛానెల్స్ మాత్రం ఈమెని ఒప్పుకోవటం లేదు. ప్రేక్షకులు తిరస్కరించేశారు. వారి ఆలోచనా స్థాయికి నేనింకా చేరుకోలేదేమో? అంటోంది. మలయాళ ఛానెల్స్ వేరే ఛానళ్ల ప్రభావానికి లోను కాకుండా ఉంటే బావుంటుందేమోనన్న అభిప్రాయాన్నీ వెలిబుచ్చింది. దాంతో - సొంత ఛానెళ్ల తీరుకి కినుక వహించి - ఎంటీవీ వైపు, మిగతా మ్యూజిక్ ఛానెల్స్ వైపు దృష్టి మరల్చింది. ఛానెల్ వి’లో ‘వెన్ లవ్ బైట్స్’ షోలో తనదైన గళ మాధుర్యంతో జనాన్ని ఆకట్టుకొంది. త్వరలోనే ఇంటర్నేషనల్ మ్యూజిక్ ఛానెళ్లలోనూ వినిపించబోతోందిట. టాలెంట్ ఉండీ - మలయాళ ఛానెళ్లలో నెగ్గుకు రాలేకపోవటానికి కారణం ఏమిటన్నది ఇప్పటికీ ప్రశ్నగానే మిగిలింది ఆమె విషయంలో.

Source: www.andhrabhoomi.net